Գիտեիք, որ ձեր տան կահույքը կարող է ազդեցություն ունենալ օրվա տրամադրության վրա։
Կահույքի դիզայնում գոյություն ունեն մի քանի խթանիչ գործոններ, որոնք նպաստում են տրամադրության փոփոխություններին։ Տան դիզայնով զբաղվելիս գլխավոր նպատակն է ստանալ էսթետիկ, ակնահաճո վերջնաարդյունք։ Բոլորս ենք ուզում, որ տան ինտերիերն ունենա շլացուցիչ տեսք, մինչդեռ որոշները կենտրոնանում են միայն հարմարավետության վրա։
Քչերն են հասկացել, որ գոյություն ունի հոգեբանական գործոն, որը ներազդում է մեր՝ կահույքի ու դեկորների ընտրության որոշման կայացման վրա։ Այս բլոգում հենց խոսելու ենք այդ հոգեբանական գործոնների մասին։
Գույների հոգեբանություն
Ինտերիերում գույները հոգեբանորեն մեծ ազդեցություն են թողնում։ Տարբեր գույներ տարբեր ասոցիացիաներ կամ հուշումներ կարող են արթնացնել։ Կարևոր է հասկանալ գույնի ճիշտ ընտրությունը կահույքի տարբեր կտորների համար։
Կարմիրն արագ է ուշադրություն գրավում և լցնում սենյակը էներգիայով։ Սակայն կարմիրը շատ հաճախ առաջացնում է սթրես ու լարվածություն։
Դեղինը տաք երանգ է, որը հայտնի է սենյակում դրական զգացմունքերի ու էներգիայի արթնացնելով։ Դեղինի չափից դուրս օգտագործումը կարող է ստեղծել անհարմարություն, լավ է բավարարվել սենյակում ընդհամենը մի քանի դեղին ակցենտներով։
Կապույտի երանգները սենյակ են բերում հանգստություն ու խաղաղություն։ Այս գույնը գերադասելի է հատկապես ննջասենյակների համար։ Այն հաճախ ասոցացվում է վստահության, ներդաշնակության ու հաջողության հետ։
Կանաչը տանը ամենահանգիստ գույներից է։ Այն նպաստում է մտքի խաղաղությանն ու հավասարակշռությանը և թույլ տալիս տանը մոտ լինել բնությանը, զգալ բնության շունչը։ Կանաչի զանազան երանգները միշտ ունեն հանգստացնող ու հանդարտեցնող էֆֆեկտ։
Չեզոք գույներ, ինչպիսիք են սևը, պաստելային երանգները,շագանակագույնը,սպիտակը ինտերիերը դարձնում են ավելի ճկուն։ Կարելի է հեշտորեն համադրել այլ գույների հետ։ Չեզոք գույներն արթնացնում են հավասարակշռության, ապահովության ու գոհունակության զգացողություն։
Կահույքի դիրք
Կահույքի ճիշտ դիրքն է որոշում տան հեշտ անցուդարձը։ Հեշտ չէ ստանալ էսթետիկ ու ֆունկցիոնալ ինտերիեր։ Եթե ձեր տանը չափից շատ են խառը դասավորված կահույքի տարբեր կտորներ, հնարավոր է ձեզ ճնշված զգաք, բայց դե մի գծով իրար կողքի շարելն էլ հարցի լավագույն լուծումը չէ։ Ընտրեք սենյակում կենտրոն, որտեղից կսկսեք կահավորումը։ Եթե սենյակում դեռ մնում է ազատ տարածք, այն ստեղծում է առատության իլուզիա և սենյակ ժամանակ անցկացնելը ավելի հաճելի է դառնում։
Էրգոնոմիկա
Կահավորելու եք աշխատասենյակ, թե տան սենյակ, էրգոնոմիկ հարմարավետությունն անխուսափելի է։ Այն պետք է համապատասխանի էրգոնոմիկ կահավորման կանոններին։ Եթե, օրինակ, գնեք գեղեցիկ աթոռ, որը համապատասխանում է ինտերիերին, բայց նստելիս ցավեցնում է մեջքը, սա արդեն խոսում է էրգոնոմիկ հարմարավետության բացակայության մասին։ Պետք է ընտրել աթոռներ, որոնք լիովին գրկում են մեջքը։Սա վերաբերում է կահույքի այլ տեսակներին։ Եթե գնել եք պահարան, որ բավական պահոցներ չունի իրերը դասավորելու համար, սա նույնպես նյարդայնացնում է։ Էսթետիկի ու հարմարավետության միջև կարևոր է գտնել բալանսը։
Բույսերը մոդեռն ինտերիեր դիզայնում
Բնության մոտ լինելը կարող է տրամադրություն բարձրացնել։ Տանը փայտից կահույք ունենալը ոչ միայն ոճային է, այլ նաև ստեղծում է հանգիստ մթնոլորտ։ Դրական տրամադրվածություն ապահովելու համար արժի տանն ունենալ սենյակային բույսեր։ Ինչպես վերևում նշեցինք, կանաչը մարդկանց վրա հանգիստ ազդեցություն է ունենում։ Բույսերը կստիպեն զգալ միշտ թարմ, զվարթ ու հանգիստ։ Ճիշտ բույսերի ընտրությունը նաև նպաստում է հիշողության ու արդյունավետության բարելավմանը և օդափոխությանը։ Սենյակում դրական էներգիայի հոսքին են նպաստում նաև ծաղկային, տրոպիկական նախշերը։
Առողջությունն ու ապահովության զգացողությունն ինտերիեր դիզայնում
Եթե տան կահավորման ժամանակ հաշվի չեն առնվել մի շարք առողջարարական ու ապահովության գործոններ, ապա հաճախ եք բարկանալու ու սթրեսի առիթներ ունենալու։ Օրինակ, եթե տանը շատ են սույր ծայրերը և եթե կան փոքրիկներ, այնքան էլ ապահով չէ, կամ կհիշեք երևի բազմոցի ծայրին ոտքով հարվածելը, ի՜նչ ցավոտ էր։
Տան ընդհանուր ապահով կահավորումն ունենում է ազդեցություն նաև հոգեկան առողջության վրա։
Սիմմետրիկություն
Սիմմետրիկությունը նույնպես կարևոր գործոն է ինտերիերը հյուրընկալ ու հաճելի դարձնելու համար։ Դրա համար անհրաժեշտ է խուսափել սուր ծայրերից, նախընտրել կոր անկյուններ, կլոր ու անկյունային ձևեր, որոնք ապահովում են սենյակում հարմոնիա։
Լուսավորությունն ինտերիեր դիզայնում
Բնական, թե արհեստական լուսավորությունը կարևոր դեր է կատարում ինտերիեր դիզայնում։ Չափից դուրս պայծառ լույսը կարող է սառը թվալ, իսկ թույլ լուսավորությունն էլ կարող է ճնշվածության զգացողություն առաջացնել։ Հյուրասենյակը տանը ամենալուսավոր սենյակը պետք է լինի․ առավոտյան բնական լույսի շնորհիվ, իսկ երեկոյան՝ արհեստական։ Ննջասենյակում պետք է ավելի հանգիստ լուսավորություն լինի։
Այսպիսով, տուն կահավորելիս կարևոր է հաշվի նստել հոգու ու մարմնի ներքին խաղաղության հետ։ Վերոնշյալ կետերին ուշադրություն դարձնելիս հենց պլանավորման փուլից ապահովում եք տան դրական աուրան։