Հայելիներն ինտերիեր դիզայնում կարևոր դետալներ են։ Օգնում են լուծել տարածականության ու լուսավորության հետ կապված խնդիրներ։
Օրինակ՝ եթե հյուրասենյակում տեղադրեք հայելին պատուհանի հակառակ կողմում, այն կարտացոլի բնական լույսը և եթե պատուհանից բացվում է գեղատեսիլ տեսարան, նույնը նաև կարտացոլվի հայելու մեջ՝ հնարավորություն տալով ձեզ ունենալ բնության գլուխգործոց տանը։
Հայելիներն ինտերիերում թեթևության ու լուսավորության կրողներն են։ Ուղղանկյուն թե կլոր՝ հայելին անձնավորում է ձեզ ինտերիերում։
ՆՆջասենյակում
Ննջասենյակում հայելին կարող է ակցենտային դեր կատարել, բայց կահույքի հետ համատեղելու համար պետք է հաշվի առնել ձևը, չափսն ու դիրքը։ Օրինակ, մեծ ուղղանկյուն հայելին գեղեցիկ է պահարանի վերևում, իսկ կլոր հայելիները հարմար է տեղադրել դատարկ պատին՝ սենյակին ծավալ հաղորդելու համար։ Դիտարկենք միասին մի քանի տարբերակներ, թե որտեղ ու ինչպես կախել հայելիները ննջասենյակում․
1․ Ամենաօպտիմալ տարբերակը հայելիով պահարանն ունենալն է, որ պետք է դրված լինի մահճակալի կողքին, անկյունում, բայց ոչ մի դեպքում մահճակալի դիմաց։
2․ Խուսափե՛ք հայելին մահճակալի դիմացը տեղադրելուց, քանի որ այդպես ստեղծվում է բացասական էներգիա սենյակում։ Փորձե՛ք կախել պատից այնպես, որ հայելիում քնած ժամանակ մահճակալին պառկած չերևաք։ Կարող է երևալ կահույքը, բայց ոչ դուք։
3․ Մյուս օպտիմալ տեղը հենց զգեստապահարանի կողքին է։
Հյուրասենյակում
Հյուրասենյակում հայելիները կարող են ծառայել և՛ էսթետիկ, և՛ ֆունկցիոնալ նպատակների։ Եթե ճիշտ տեղադրվի արտացոլվող լույսի շնորհիվ սենյակը ավելի լուսավոր ու ընդարձակ տեսք կունենա։ Դրանք կարող են օգտագործվել նաև սենյակում կոնկրետ դեկորատիվ, ճարտարապետական առանձնահատկություններն ընդգծելու համար։
Ընտրե՛ք այնպիսի վայր, որտեղից բացվում է հրաշալի տեսարան։ Եթե տեղադրում եք պատուհանի դիմաց, այն պետք է այնպիսի անկյան տակ լինի, որտեղից հեշտորեն կարտացոլի բնական լույսը։
Ճաշասենյակում
Ճաշասենյակում կարևոր է հայելին կախել այնպես, որ երևա ճաշասեղանի հավաքածուն կամ գոնե սեղանի վրա դրված ծաղկամանը կամ մոմակալը։ Եվ եթե ճաշասենյակում ճաշելիս հայելու մեջ երևում է ամբողջ ընտանիքը միասին, դա հաջողության, բարեկեցության, սիրո, ջերմության ու մտերմության խորհրդանշան է։ Հայելին ճաշասենյակը դարձնում է ավելի հյուրընկալ, ինչպես նաև կարող է օգնել ձեզ հետևել ինքներդ ձեզ ճաշելիս։
Միջանցքում
Այստեղ փորձե՛ք տեղադրել հայելին այնպես, որ չլինի դռան դիմաց, այլապես այդպես կվանի տուն մտնող դրական էներգիան։ Կարող եք կախել ցանկացած պատից կիսասեղանի վերևում այնպես, որ չնայի դռանը։ Եթե ձեր միջանցքը երկար ու նեղ է, լավ կլինի տեղադրել հայելին սենյակի վերջում այն ավելի ընդարձակ դարձնելու համար։ Եթե միջանցքը լայն ու փոքր է, հայելին կախեք պատերից որևէ մեկից, սենյակին խորություն հաղորդելու համար։ Խուսափել երկու հայելի իրար դեմդիմաց՝ կախելուց շփոթեցնող ու ապակողմնորոշող ազդեցությունից հեռու մնալու համար։
Երբ հերթը հասնում է հայելու կախելուն, անհրաժեշտ է հաշվի առնել, թե ինչ ֆունկցիա է այն կատարելու։ Օրինակ, եթե հայելու մեջ սիրում եք նայել, ստուգել, թե ինչ տեսք ունի հագուստը, խորհուրդ է տրվում գնել բարձր հայելիներ, եթե լոգասենյակում եք տեղադրելու, այն պետք է հարմար լինի սափրվելու համար։
Հայելու բարձրությունից նույնպես կախված է ամբողջ սենյակի տեսքը։ Հայելին պետք է այնպես կախել, որ հայացքի հետ հավասար լինի, որպեսզի ստեղծվի սենյակում հավասարակշռություն։ Փոքր սենյակում բարձր կախած հայելին տեսողական ավելի ընդարձակ է դարձնում սենյակը։ Ցածր կախած հայելին սենյակն ավելի փոքրացնում է։ Իրականում, ինքներդ պետք է փորձարկեք տարբեր բարձրություններ, մինչև գտնեք ձեզ համար օպտիմալ տարբերակը։
Հարմար տեղադրված հայելին կարող է արտացոլել բնական լույսը ամբողջ սենյակում, իսկ վատ տեղադրված հայելին կարող է արտացոլել սենյակի այն կողմը, որն այնքան էլ չեք սիրում։ Որպես էներգիայի աղբյուր տեղադրեք հայելին այնտեղ, որտեղից կարտացոլի այն անկյունը, որով հպարտանում եք։ Լավագույն տեղը հենց պատուհանի դիմացն է, որ արտացոլի այն, ինչ կա դրսում, եթե հատկապես դրսում բացվում է գեղեցիկ տեսարան։
Հայելիները պատին որպես խմբավորում օգտագործելը հետաքրքիր տարբերակներից է։ Այստեղ կարևոր է, որ լինեն տարբեր չափսերի՝ համաչափ տեսք ստանալու համար։